Нүүр хуудас Танд тустай Хөшиг интерьерийн салшгүй хэсэг

Хөшиг интерьерийн салшгүй хэсэг

2230
0

 

Өргөө гэрийн тань хойморийг эзлэх хөшиг тюль нь танай гэрийн өнгө үзэмжийг шууд илтгэнэ. Байрандаа засвар хийсний дараа тавилга сэлтээ сонгох гээд чамлахааргүй ажил ундарна. Өөрийнхөө сэтгэлд таарсан тавилгыг сонгох гэж их хотын гудамжаар хөлөө эцтэл бэдэрсний эцэст ямартаа ч сэтгэл хангалуун байхаар сонголт хийж чадлаа. Гэтэл хамгийн чухал зүйлээ мартчихаж. Энэ бол хөшиг. Хүүхдийн өрөөнд үлгэрийн баатруудтай, хачин чамин хөшиг сонгочихож болох л байх. Харин унтлагын, зочны, гал тогооныхоо өрөөнүүдэд ямар хөшиг сонгох вэ?

Хөшиг өрөө тасалгааны интерьерийн голлох хэсгүүдийн нэг. Гэвч түүнийг ханын цаас, шалны өнгө, тавилгынхаа хэв маягтай зохицуулна гэдэг санасны зоргоор бүтэх амар зүйл биш. Танай гэр бүхэлдээ нэгэн цогц, ая тухтай, сэтгэл амар, дотно дулаан мэдрэмж төрүүлж байх ёстой. Хөшиг, тавилга, өнгө будаг сайхан зохицож байвал тэр хэрээр хүний сэтгэл санаа, амьдрах ая тухтай орчин бүрддэг юм шүү.Танд амжилт хүсье.

Унтлагын өрөө – Унтлагын өрөөний хөшгийг сонгохдоо синтетик буюу нийлмэл эдээр хийгдсэн материалтайг нь сонгоорой. Түүнээс гадна тюль, даавуун гэсэн гурван давхар хөшигтэй байх нь илүү тааламжтай нөхцөл бүрдүүлнэ гэж дизайнерууд үздэг байна. Тюль нь нарны гэрлийг өрөөнд нэвтрүүлснээр байгалийн гэрлийг ашиглах нөхцөл бүрдүүлдэг бол нийлмэл эдээр хийсэн бараан өнгийн хөшиг нарны гэрлийг нэвтрүүлдэггүй. Өөрөөр хэлбэл өдөр ч гэсэн та унтаж болно. Тэр үед гэрэл нэвтрүүлдэггүй бараан өнгийн хөшиг хэрэг болно.

Гал тогооны өрөө – “Кафе” маягийн хөшиг нь гал тогооны өрөөнд тохиромжтой. Ийм хөшиг нь тодорхой тусгаарлалт бий болгох боловч байгалийн гэрэл тусахад саад болдоггүй. Мөн цонхны зөвхөн доод хэсгийг хаадаг бөгөөд хөшигний дээгүүр нь өдрийн гэрэл чөлөөтэй нэвтэрнэ. Хэрэв цонхны цаана үзэгдэх орчин тааламжтай бус бол ийм маягийн хөшиг хаах боловч цонхны өөрийнх нь үзэмжийг бүхлээр нь халхалдаггүй сайн талтай. Түүнийг тюлээр орлуулах буюу урт хөшигтэй зохицуулж ч болдог. Тэгээд ч “Кафе” маягийн хөшгийг хийхэд их хэмжээний даавуу ордоггүй. Түүнийг даавууны үлдэгдэл ашиглан өөрөө ч хийж болох юм.

 Зочны өрөө – Сүүлийн үед интерьер ертөнцөд дорнын хэв маяг хүчтэй орж ирж байгаа. Тиймээс нүсэр тавилга, элдэв тод өнгийн хөшигнөөс илүүтэй хэний ч тоодоггүй эмээгийнхээ арслантай бор авдар, зэс домбыг нь авчраад том өрөөндөө тавьчих. Арслантай авдар чинь бага зэрэг халцарсан байсан ч хамаагүй. Хажууд нь хослуулж ази хэв маягтай луу, цэцгэн хээтэй торгон хөшиг өлгөхөө мартав.Үүнээс гадна хослуулах сандал, зураг, эсгий ширдэг тавиарай. Иймэрхүү маягаар өөрчилснөөр таны гэр уламжлалт хуучинсаг уйтгартай болно гэж битгий бодоорой. Харин ч эсрэгээрээ жинхэнэ орчин үеийн шийдэл гэдгийг мэдрэх болно. Магадгүй хэрээс давсан үнэтэй нүсэр тавилгуудаас илүү таныг сэтгэл зүйн хувьд тайван амгалан болгож ч мэднэ. Хэрвээ энэ хэв маяг танд таалагдахгүй байгаа бол юуны түрүүн өрөөндөө сэтгэл татам, зөөлөн, дулаан уур амьсгалыг төрүүлэхийн тулд хананы өнгөтэй уусч байхаар тооцон хөшгөө сонгоорой. Эцэст нь хэлэхэд хөшгийг зөвхөн хэрэглээ талаас нь авч үзэхээ болиод чимэглэл, интерьер талаас нь бодолцох болсон гэдгийг сануулъя.

ХАРИУ ҮЛДЭЭХ

Please enter your comment!
Please enter your name here