2019.03.12 · niitlelch.mn (Archiv) · Архив

Боингийн хамгийн борлуулалттай байгаа онгоцны нислэгүүдийг цуцаллаа

Орон нутгийн цагаар ням гарагийн өглөө Этиоп улсын иргэний агаарын тээврийн Boeing 737 Max 8 нисэх онгоц осолдож, дотор зорчиж явсан бүх хүн харамсалтайгаар амь үрэгдсэн билээ. 149 зорчигч, нислэгийн багийн 8 гишүүн нийлээд 157 хүн онгоцны ослоор таалал төгсжээ.

Зүүн Африкийн Этиоп улсын нийслэл Аддис Абаба хотын нисэх буудлаас Boeing 737 Max 8 нисэх онгоц өглөөний 8:38-д хөөрсөн бөгөөд 8:44-ийн үед холбоо тасарч, улмаар сүйрчээ.

Одоогоор ослын шалтгааныг хараахан тогтоогоогүй байгаа боловч, цоо шинэ онгоц байсан гэдгийг албаны хүмүүс хэлж байна. Бүр тодруулбал өнгөрсөн оны 11 дүгээр сарын 15-нд Этиопийн иргэний агаарын тээврийн компани хүлээн авч, үйлчилгээнд оруулсан шинэ онгоц байжээ.

Эргэн сануулахад яг үүнтэй адил загварын буюу Boeing 737 MAX 8 нисэх онгоц нь өнгөрсөн 2018 оны 10 дугаар сард Индонез улсад осолдож, 189 хүн амиа алдаж байсан билээ.

Ердөө 5 сарын дотор 2 ч удаа Boeing 737 Max 8 загварын нисэх онгоц осолдсонтой холбогдуулан дэлхийн улс орнууд арга хэмжээ авч эхлээд байна. Хятад улсад л гэхэд дотоодын нислэг үйлддэг Boeing 737 MAX 8 онгоцнуудыг бүгдийг нь нислэг үйлдэхийг хориглож, түр хугацаанд түдгэлзүүлжээ.

Мөн одоо агаарт яваа, нислэг үйлдэж буй Boeing 737 MAX 8 загварын онгоцнуудыг яаралтай газардах, нислэгээ цуцлахыг даалгасан байна.

Дашрамд хэлэхэд Боинг компанийн MAX 8 загвар нь хамгийн хурдтай борлогдож байгаа онгоц төдийгүй, энэ оны 2 сарын байдлаар нийт 5100 захиалга хүлээн аваад байгаа гэнэ. Түүнээс 350-ыг нь үйлдвэрлэж, аль хэдийн үйлчилгээнд нэвтрүүлжээ.

Хамгийн гол давуу тал нь түлш зарцуулалт өмнөх загваруудаас даруй 14 хувиар бага, эдийн засгийн хэмнэлттэй, хурд хүчтэй онгоц ажээ.

Энэ нийтлэл niitlelch.mn-ийн өмнөх архиваас. Анх нийтлэгдсэн огноо дээр заагдсан.
🗎 Архивлагдсан хувь (2026-10-24)
Архивлагдсан хувь: бид эх сурвалжийн HTML-ийг татаж авсан тэр мөчид нь хадгалдаг. Эх нийтлэл устсан, өөрчлөгдсөн ч энд юу бичигдсэн байсныг харж болно. Хяналтын нийлбэр (SHA-256) нь файл өөрчлөгдөөгүйг баталгаажуулна.

⚑ Алдаа мэдэгдэх

Сэтгэгдэл (0)

Сэтгэгдэл алга.

Сэтгэгдэл бичихийн тулд нэвтэрнэ үү.