Нийслэлийн Засаг даргын Тамгын газар, нийслэлийн Жижиг, дунд үйлдвэрийг дэмжих төв хамтран “Улаанбаатарт үйлдвэрлэв-2017” үзэсгэлэн худалдааг хоёр өдрийн турш амжилттай зохион байгууллаа. Тодруулбал, нийслэлээс жижиг, дунд үйлдвэр эрхлэгчдийг дэмжих, борлуулалтыг нэмэгдүүлэх, бараа бүтээгдэхүүнийг гадны зах зээлд таниулан сурталчлах, хэрэглэгч захиалагчтай холбох зорилготой тус үзэсгэлэн худалдаа энэ сарын 9, 10-нд Монголын үйлдвэрчний эвлэлийн соёлын төв ордонд болж, өнөөдөр шилдэг үйлдвэрлэл эрхлэгчдийг шалгаруулав. Уг арга хэмжээнд нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаа, НИТХ-ын тэргүүлэгч, нийслэлийн ЖДҮ-ийг дэмжих төвийн дарга Д.Баярсайхан, нийслэлийн 9 дүүргийн ЖДҮ-ийг дэмжих төвийн дарга нар болон үндэсний үйлдвэрлэгчид, худалдан авагчид оролцсон юм. “Улаанбаатарт үйлдвэрлэв-2017” үзэсгэлэн худалдаанд амжилттай оролцсон шилдэг үйлдвэрлэл эрхлэгчээр “Мон ланс” ХХК, “Монгол шаглаа” ХХК-ийн хамт олон тодорлоо. Шилдэг 2 аж ахуйн нэгжид ӨМӨЗО-ны Хөх хотод зохион байгуулагдах “Монгол-Хятадын экспо” үзэсгэлэн худалдаанд үнэ төлбөргүй оролцох эрхийн бичиг, өргөмжлөлийн хамт гардуулав. Мөн “Улаанбаатарт үйлдвэрлэв-2017” үзэсгэлэн худалдаанд оролцогчдоос тусгай байранд 10 аж ахуйн нэгжийг шалгаруулж, тус бүр өргөмжлөл, 500 мянган төгрөгөөр урамшуулсан юм.“Улаанбаатарт үйлдвэрлэв-2017” үзэсгэлэн худалдаанд амжилттай оролцож, шилдэг үйлдвэрлэл эрхлэгчээр тодорсон “Монгол шаглаа” ХХК-ийн төлөөлөл “Биднийг дэмжиж жил бүр тус үзэсгэлэн худалдааг зохион байгуулдаг нийслэлийн Засаг даргын Тамгын газар болон нийслэлийн жижиг дунд үйлдвэрийг дэмжих төвийнхөндөө баярлалаа. Та бүхэнд ажлын өндөр амжилт хүсье”гэлээ.
