Шатар сонирхогчдын улсын аварга шалгаруулах тэмцээн болж байна
Монгол Улсын Үндсэн хууль батлагдсан өдөрт зориулан УИХ-аас уламжлал болгон зохион байгуулдаг Шатар сонирхогчдын улсын аварга шалгаруулах тэмцээний шигшээ шат өнөөдөр Төрийн ордонд эхэллээ.
Тэмцээнийг нээж Монгол Улсын Их Хурлын дарга М.Энхболд үг хэлэв.
Тэрбээр нийт оролцогчдод хандан тэмцээнд амжилттай оролцохыг хүсээд “Жил бүрийн нэгдүгээр сард Монгол Улсын шинэ Үндсэн хууль батлагдсан өдрийг тэмдэглэн өнгөрүүлдэг уламжлалтай.
Энэ өдрийг тэмдэглэн өнгөрүүлэх хүрээнд олон арга хэмжээ зохион байгуулагддаг бөгөөд үүн дотроос Шатар сонирхогчдын улсын аварга шалгаруулах тэмцээнийг зургаан жилийн өмнөөс Улсын Их Хурлын даргын ивээл дор зохион байгуулдаг уламжлал тогтсон. Юуны өмнө зургаан жилийн хугацаанд энэ тэмцээнд оролцсон, зохион байгуулсан хүмүүст баяр хүргэж, чин сэтгэлийн талархал илэрхийлье.
Жилээс жилд тэмцээн цар хүрээгээ тэлж, олон хүн оролцож байгаа. Өнгөрсөн жилийн тэмцээнд 6200 гаруй шатарчин оролцсон бөгөөд энэ жилийн тэмцээнд 6700 гаруй хүн оролцсон дүн мэдээ ирсэн. Оролцогчдын тоо нэмэгдэж байгаа нь энэ тэмцээний чанар чансаа сайжирч байгаагийн илэрхийлэл гэж үзэж байна.
Түүнчлэн гадаад улсад ажиллаж, амьдарч буй монголчууд эх орондоо ирж энэхүү тэмцээнд оролцож байгааг онцлон хэлье.
Шатар бол хүний оюун ухааныг тэлж, логик сэтгэлгээг хөгжүүлж, тэсвэр тэвчээрийг бий болгодог спорт. Энэ ч үүднээсээ миний хувьд төрсөн нутаг Төв аймагтаа шатрын 27 клубыг байгуулсан. Цаашдаа Төв аймгаас олон шатарчид төрөн гарна гэдэгт итгэлтэй байна.
Манай шатарчид тив, дэлхийн тэмцээнүүдэд амжилттай оролцож байна. 2014 онд болсон Сонирхогчдын дэлхийн аварга шалгаруулах тэмцээнээс манай шатарчид алт, мөнгө, хүрэл медаль авч байсан бол 2017 онд болсон дээрх тэмцээнээс Э.Хулан алтан медаль хүртэж, дэлхийн хошой аварга болсон амжилтыг үзүүлсэн. Ийнхүү шатрын спортыг хөгжүүлэхэд үйлсэд хувь нэмрээ оруулан ажиллаж буй бүх хүмүүст талархал илэрхийлж, өнөөдрийн тэмцээнд оролцож буй шатарчидад амжилт хүсье” гэв.
Дараа нь УИХ-ын дарга М.Энхболд эхний нүүдлийг шатрын Их мастер Ц.Батчулуунтай хийж, тэмцээнийг албан ёсоор эхлүүллээ.
Хагас шигшээ тэмцээнээс шалгарсан эрэгтэй, эмэгтэй 140 гаруй тамирчин өнөөдөр улсын аваргын шигшээ шатны тэмцээнд өрсөлдөж байна.
Тэмцээнд тэргүүлсэн эрэгтэй нэг, эмэгтэй нэг шатарчинд спортын дэд мастер цол олгоно.
Энэ жилийн тэмцээний онцлог нь дээрх цолыг олгохоос гадна шатар сонирхогчдын Ази тивийн аварга шалгаруулах тэмцээнд оролцох эрх олгоно. Тэмцээнд оролцох зардлыг зохион байгуулагч тал хариуцах юм.
