Элчин сайдад нэр дэвшигчдийн дунд сайд Ц.Нямдоржийн хүү Анхбаярын нэр яваа талаар мэдээлэл гараад байгаа юм. Энэ тухай болон хаврын чуулганаар томилох Элчин сайд нарын талаар Гадаад хэргийн сайд Д.Цогтбаатар
-Хаврын чуулганаар бүрэн эрхийн хугацаа нь дууссан 10 гаруй Элчин сайдын оронд шинэ Элчин сайдыг томилох асуудлыг өргөн барина гэж байсан. Хэзээ өргөн барих вэ?
-Манай улсаас гадаад улс оронд суугаа Элчин сайд нар бүгд хэвийн үйл ажиллагаагаа явуулж байгаа. Ганцхан БНСУ-д л Элчин сайдгүй байгаа. Учир нь дараагийн Элчин сайд томилогдсоноор нөгөө Элчин сайд чөлөөлөгдөж буцдаг. Энэ жишгийн дагуу Б.Хурцыг Солонгост суух Элчин сайдаар томилсон байсан ч манай тал саналаа буцаан татсан учир Элчин сайдгүй байгаа.
– Ц.Нямдорж сайдын хүүг Элчин сайдаар томилох гэж байна гэсэн мэдээлэл сүүлийн үед гараад эхэллээ. Энэ үнэн үү?
-Тэр хүн манай яамны Тамгын газрын дарга. Одоо Гадаад хэргийн яаманд ажиллаж байгаа хүн. Сан-Францискод ч консул байсан. Элчингээр явах цаг нь бол болсон хүн. Гэхдээ одоогоор ямар ч хүний тухай асуудал яригдаагүй байна. Ээлж дараатай, хугацаагаараа явдаг юм шүү дээ. Одоогоор хувь хүмүүсийн талаарх асуудал юу ч яригдаагүй, болоогүй байна. Гэхдээ хэнийг Элчин сайдаар томилох, эс томилох эцсийн шийдвэрийг УИХ, Ерөнхийлөгчийн төвшинд гаргана.
