Нүүр хуудас Эдийн засаг ХХААХҮ-ийн сайд П.Сэргэлэн Саудын Арабын төлөөлөгчидтэй уулзлаа.

ХХААХҮ-ийн сайд П.Сэргэлэн Саудын Арабын төлөөлөгчидтэй уулзлаа.

115
0

ХХААХҮ-ийн сайд П.Сэргэлэн Саудын Арабын Хунтайж Абдулла Бин Абдулрахман Бин Абдулазиз Аль Сауд тэргүүтэй төлөөлөгчдийг хүлээн авч 2017 оны 8 сарын22-нд уулзлаа. Уулзалтын эхэнд ХХААХҮ-ийн сайд П.Сэргэлэн  Хунтайж Абдулла Бин Абдулрахман Бин Абдулазиз Аль Саудыг хүрэлцэн ирсэнд талархал илэрхийлээд Хүнс, хөдөө аж ахуйн салбарын өнөөгийн байдал, цаашдын хөгжлийн зорилтын талаар товч мэдээлэл өгөв. “Монгол Улсын Засгийн газраас  хүнс, хөдөө аж ахуй, хөнгөн үйлдвэрийн салбарт  “Эрүүл хүнс- Эрүүл монгол хүн” уриан дор “Мах сүүний анхдугаар аян”,  “Үйлдвэржилт 21:100”, “Атрын III аян”-ыг үргэлжлүүлэх  зэрэг томоохон хөтөлбөрийг  хэрэгжүүлэн ажиллаж байна.  “Мах, сүүний  анхдугаар аян”-ыг хэрэгжүүлж эхэлснээс хойш олон ажил хийж байгаагийн нэг нь махны экспортыг нэмэгдүүлэх юм.

Монгол Улс Саудын Араб Улстай хөдөө аж ахуйн салбарт хамтран ажиллах өргөн боломж  байгаа. Манай Улс мал, мах экпортлох асар их нөөц бололцоотой орон. Монгол Улс жилд дунджаар  150.4 гаруй мянган тонн мах экспортлох боломжтой гэсэн тооцоолол бий. Манай улсын нийт малын тоо өнгөрсөн оны байдлаар 61.5 сая толгойд хүрсэн.

2016 онд 9.2 мянган тонн мах, махан бүтээгдэхүүн ОХУ, БНХАУ руу экспортолсон. Хөрш орнуудын зах зээлийн эрэлт нь гол төлөв бод малын мах  байдаг.  Харин манай улсын нийт малын 85 орчим хувийг бог мал эзэлдэг. Тиймээс хонь, ямааны мах гуравдагч орнууд руу экспортлох нөөц боломж байгаа учир хамтарсан махны үйлдвэр байгуулах саналтай байгааг ХХААХҮ-ийн сайд П.Сэргэлэн онцлов.

Саудын Арабын Хунтайж Абдулла Бин Абдулрахман Бин Абдулазиз Аль Сауд “Манай улсын хувьд махны хэрэглээ өндөр улс. Хамтарсан махны үйлдвэр байгуулах талаар судалж хамтарсан ажлын хэсэг байгуулах саналтай байна”  гэдгийг хурлын үеэр онцоллоо.  Саудын Арабын Хунтайж Абдулла Бин Абдулрахман Бин Абдулазиз Аль Сауд ХХААХҮ-ийн сайд П.Сэргэлэнг өөрийн улсад албан ёсны айлчлал хийхийг урьж, хүлээн авч уулзсанд талархал илэрхийлэв.

ХАРИУ ҮЛДЭЭХ

Please enter your comment!
Please enter your name here