Хонгконгийн Амиа хорлолттой тэмцэх бүлэг онлайн орчинд тархаж байгаа аюултай тоглоомноос залуу үеийнхнийг хамгаалах тухайд иргэддээ анхааруулж уриалга гаргасан байна.
“Цэнхэр халим” нэртэй тоглоом сүүлийн үед Хонгконгийн сошиал орчинд үзэгдэх болсноос ийм сэрэмжлүүлэг гаргахад хүрсэн байна. Олон улсын хэмжээнд гарсан хэд хэдэн амиа хорлолтын хэрэгт энэ тоглоомыг холбон шалгаж байгаа ба Хятад, Британи, Шинэ Зеланд, Франц зэрэг орнууд өсвөр насныханд хандаж сэрэмжлүүлэг гаргажээ.
Энэ долоо хоногийн эхээр Хятадын 15 муж, хотын цагдаагийн газар “Цэнхэр халим”-ны эсрэг хориг зарласан байна. Хятадын QQ мессенжэр үйлчилгээг эзэмшдэг Tencent компани өөрийнх нь сүлжээнд үүссэн “Цэнхэр халим”-тай холбоотой байж магадгүй 12 бүлгийг шалгаж эхэлжээ.
Уг тоглоомыг бүтээгч 21 настай Оросын иргэн Филипп Будейкинийг орон нутгийн эрх баригчид баривчлаад байгаа ба өнгөрсөн оны арваннэгдүгээр сард гарсан доод тал нь 16 өсвөр насны охины амиа хорлосон хэрэгт сэжиглэн шалгаж байгаа юм.
Саяхан Хонгконгийн их сургуулийн нэгэн оюутан гурван найз нь өөрсдийгөө “халим” болсон гэж фэйсбүүк хуудсандаа мэдээлээд, өөрсдийн боолттой гарны зургийг оруулсан хэмээн анх мэдээлжээ.
Гар дээрээ халимны дүрсийг сийлэх нь уг тоглоомын даалгавруудын нэг юм байна. Дээрх хөдөлгөөнийг санаачлагчдын нэг профессор Пол Ип Сю-Фай эцэг эхчүүд, багш нар, оюутан сурагчдад өөрийн хүүхэд, сурагч, үе тэнгийнхнийхээ этгээд ааш авирыг хянаж байхыг зөвлөсөн байна. Эцэг эхчүүд, багш нар хүүхдүүдийг уг тоглоомоор тоглож байгааг нь илрүүлбэл шууд таслан зогсоохын оронд хүүхдүүдтэй ярилцаж, тулгараад байгаа асуудлыг нь шийдэхэд туслах хэрэгтэй гэсэн байна.
