Нүүр хуудас Улс төр Монголын соёлын дүр төрхийг бүрдүүлэхэд өндөр хувь нэмэр оруулсан хэмээн шагнав

Монголын соёлын дүр төрхийг бүрдүүлэхэд өндөр хувь нэмэр оруулсан хэмээн шагнав

96
0
olon-ulsiin-shagnaliin-ezen
Монголын соёлын дүр төрхийг бүрдүүлэхэд өндөр хувь нэмэр оруулсан хэмээн шагнав

Олон улсын сайн үйлсийн “Рерихийн өв” сангаас ОХУ-ын нэрт зураач, зохиолч, архелогич, философич, дэлхийн соёлыг хөгжүүлэхэд үнэтэй хувь нэмэр оруулсан Николай Рерихийн нэрэмжит олон улсын шагналын эзнийг жил бүр тодруулдаг уламжлалтай.

Энэ дагуу 2018 оны Николай Рерихийн нэрэмжит олон улсын шагналыг Монгол Улсын Ерөнхийлөгч Х.Баттулга хүртлээ. Энэ нь өнгөрсөн 16 жилийн хугацаанд Николай Рерихийн нэрэмжит олон улсын шагналыг Төрийн тэргүүн хүртсэн анхны тохиолдол болж байгаа юм байна.

Монгол Улсын Ерөнхийлөгч Х.Баттулгыг “Дэлхий дахинд Монгол Улсын соёлын дүр төрхийг бүрдүүлэхэд өндөр хувь нэмэр оруулсан” гэж өндрөөр үнэлж буйгаа “Рерихийн өв” сангаас өнгөрсөн долоо хоногт зарласан юм.

Монгол Улсын Ерөнхийлөгч Х.Баттулгыг:

Монгол Улсын Архангай аймгийн Өндөр-Улаан сумын Хануй багийн нутагт “Гол Мод II” хэмээх газарт МЭӨ 110-аад оны үед хамаарах эртний Хүннүгийн хаад, язгууртны булш бунханыг илрүүлж судалсан археологийн том цар хүрээтэй ажлыг дэмжсэн,

Чингис хааны морьт хөшөө, XIII зууны аялал жуулчлалын цогцолборын бүтээн байгуулалтыг бий болгосон,
Монголчуудын оюун санааны дархлааг соёлоор дамжуулан бий болгох, аялал жуулчлалыг хөгжүүлэх зорилготой “Майдар” төслийг эхлүүлж, Өндөр гэгээн Занабазарын хийц, дэг жаягаар бүтээсэн Майдар бурханы 54 метр өндөртэй босоо хөшөөг бүрэн цутгаж, барьж эхэлсэн зэрэг олон төслөөр Монгол Улсын соёлын дүр төрхийг бүрдүүлсэн гэж үзсэн байна.

Шагнал гардуулах ёслол 2018 оны аравдугаар сарын 13-ны өдөр ОХУ-д болж, шагналыг Монгол Улсын Ерөнхийлөгчийн нэрийн өмнөөс Монгол Улсын Ерөнхийлөгчийн Тамгын газрын дэд дарга Г.Байгалмаа гардаж авсан юм. Тэрбээр шагнал гардаж авах үеэрээ Монгол Улсын Ерөнхийлөгч Х.Баттулгын нэрийн өмнөөс олон улсын сайн үйлсийн “Рерихийн өв” сангийн хамт олонд гүн талархал илэрхийлж, үг хэлэв.

МОНГОЛ УЛСЫН ЕРӨНХИЙЛӨГЧИЙН ТАМГЫН ГАЗРЫН ДЭД ДАРГА Г.БАЙГАЛМАА:

Монгол Улсын Ерөнхийлөгчийн нэрийн өмнөөс дэлхий дахин дахь Монгол Улсын соёлын дүр төрхийг бүрдүүлэх салбарт хийсэн түүний үйл ажиллагааг өндрөөр үнэлж, Николай Рерихийн нэрэмжит Олон улсын шагналыг гардан авч буйд чин сэтгэлийн талархал илэрхийлье.

Та бүхэн сайн мэдэж байгаагаар, Монгол Улс нь өнө эртний түүх, соёл, оюуны өвтэй орон билээ. Монгол Улс нь нүүдэлчин соёл иргэншил болоод түүний онцлог соёлын өлгий нутаг юм. Монгол Улсын түүх нь Торгоны зам, Ард түмнүүдийн их нүүдэл, Монголын энх тайван буюу “Pax Mongolica” зэрэг дэлхийн түүхэн үйл явдалтай салшгүй холбоотой.

НҮБ-ын тунхаглалууд болж хөгжсөн “Рерихийн гэрээ” гэгдэх соёлын үнэт зүйлсийг хамгаалах тухай олон улсын анхны гэрээг байгуулахад гүйцэтгэсэн Н.К.Рерихийн үүргийг болон дэлхийн соёлыг хөгжүүлэхэд оруулсан түүний хувь нэмрийг өндрөөр үнэлдэг. Тэрээр тухайн үеийн нийгмийн нэрт зүтгэлтнүүдийг соёл, энхийг хамгаалах хөдөлгөөнд татан оруулж чадсан билээ.

Дэлхийд цуутай агуу их зураач, гүн ухаантны хувьд тэрээр соёлыг хамгаалан хөгжүүлэхгүйгээр, хүн өөрийн гарал үүсэлд эргэн хандахгүйгээр хүмүүн төрөлхтний цаашдын хувьсал боломжгүй гэдэгт итгэл дүүрэн байсан.

Азийн түүхийг бүхэлдээ, түүний дотор Монголын түүхийг судлахад онцгой байр суурь эзэлдэг Н.К.Рерихийн Төв Азийн экспедицийн үеэр Азийн бага судлагдсан бүс нутагт археологийн болон угсаатны зүйн судалгаа хийгдсэн.

Агуу их зураач, соёлын зүтгэлтэн болох тэрээр Монгол судлалыг хөгжүүлэхэд үлэмж их хувь нэмэр оруулж, дорнын жижиг орнуудын түүхийг нээж, бүх хүмүүн төрөлхтний соёл иргэншил дэх тэдний ач үүргийг үнэлсэн байдаг. Том, жижиг соёл иргэншлүүдийн нэгдмэл байдал, ижил ач холбогдлын тухай түүний үзэл баримтлалын ач холбогдол нь жижиг ард түмнүүд, үндэстнүүдийн хувь заяа шийдэгдэж буй даяаршлын өнөөгийн эрин зуунд нэмэгдэж байна.

Н.К.Рерихийн хувьд Монгол Улс нь бол цаашдын бүтээн байгуулалтад чиглэсэн амьдралын үлэмж их нөөц боломжтой орон байсан. Тийм учраас Рерихийн хөдөлгөөн нь Монголын хувьд их чухал юм.

Олон улсын харилцаа даяаршиж, хүчирхэг эдийн засгуудын давамгайлал дор үндэсний онцлог, үнэт зүйлсийн хүчин зүйл бүдгэрч буй эдүгээ цагт Монгол Улсын төр, засгийн бодлого нь монгол хэлтэн, монгол туургатны удам угсаа оршин суугаа улс орнуудтай эдийн засаг, соёл, хүмүүнлэгийн харилцаа холбоо,

хамтын ажиллагаагаа аль болох үр бүтээлтэй хөгжүүлэн бэхжүүлэх, монгол угсаатны соёл, зан заншил болон нүүдлийн иргэншлийн өв уламжлалыг хамгаалан хөгжүүлэх, тэдгээрийг сурталчлах үйлсэд дэлхийн монголчуудын хүчин чармайлтыг нэгтгэхэд чиглээд байна.

Өнөөдөр бидэнд гардуулж буй Николай Рерихийн нэрэмжит Олон улсын шагнал нь цаашид соёлын өвийг хадгалахад чиглэсэн бидний цаашдын үйл ажиллагаанд урам зориг өгч байна.

Эцэст нь, Олон улсын сайн үйлсийн “Рерихийн өв” санд дахин талархал илэрхийлж, Монголын нийгмийг Рерихийн агуу их өвтэй танилцуулахад дэмжлэг үзүүлэхэд бэлэн буйгаа мэдэгдэж байна” гэсэн юм.

ХАРИУ ҮЛДЭЭХ

Please enter your comment!
Please enter your name here