~Нийтийн тээвэрт цахилгаан автобус зорчино~
Агаарын бохирдлыг бууруулах, үндэсний үйлдвэрлэлийг хөгжүүлэх зорилгоор МОН-30 загварын том оврын хоёр ширхэг цахилгаан автобус үйлдвэрлэж, нийтийн тээврийн үйлчилгээнд туршихаар Засгийн газрын хуралдаанаар шийдвэрлэлээ.
Импортын том оврын нэг автобусны үнээр хоёр автобус үйлдвэрлэх боломжтой бөгөөд Засгийн газраас хөрөнгө гаргах болсон байна. Импортын автобус сардаа 4 сая орчим төгрөгийн шатахуун зарцуулдаг бол МОН-30 автобус сард 820 мянган төгрөгийн цахилгаан хэрэглэнэ гэсэн тооцоо хийжээ.
Дотоодын үйлдвэрлэгчид Ардын хувьсгалын ой, Үндэсний их баяр наадмын үеэр нэг автобусыг нь хүлээлгэн өгөхөөр болсон байна.
Дотооддоо үйлдвэрлэсэн нийтийн тээврийн үйлчилгээнд цахилгаан автобус явуулснаар ажлын байр бий болж, зардал буурна гэж Засгийн газар үзэж буй аж. МОН-30 цахилгаан автобус нь нэг удаа цэнэглээд 300 км зам туулах боломжтой.
Тэгвэл нийслэлийн нийтийн тээврийн үйлчилгээнд ашиглаж байгаа том оврын автобус хоногт дунджаар 200 км явдаг байна. Манай улс 2007-2017 онд 126 цахилгаан тээврийн хэрэгсэл угсарч үйлдвэрлэжээ.
Энэ талаар Зам, тээврийн хөгжлийн сайд Ж.Бат-Эрдэнэ “Гадаадаас 400 орчим мянган ам.доллароор том оврын автобус оруулж ирдэг. Харин МОН-30 автобус 195.5 мянган ам.доллароор үйлдвэрлэгдэх тооцоотой байна.
Гаргах урсгал зардал нь тав дахин хямд байна. Энэ цахилгаан автобусыг үйлдвэрлэснээр агаарын бохирдлыг бууруулах, дотоодын үйлдвэрлэлийг дэмжинэ” гэлээ.
