~Эрдэнэт хотод өвөлжилтийн бэлтгэл 62 хувьтай байна~
Орхон аймгийн Засаг даргын ээлжит шуурхай зөвлөгөөн хуралдлаа. Энэ удаагийн хуралдааныг Орхон аймгийн Засаг даргын орлогч А.Түвшинжаргал удирдан явуулав.
Бичил хорооллуудын зарим байруудын подвальд нохой бөөс үржсэн байгаа тул удалгүй устгал хийх ажлыг эхлүүлэхээр боллоо.
Хотын захирагчийн албанаас хотын өвөлжилтийн бэлтгэл ажлыг хангахаар 59 нэр төрлийн ажил төлөвлөсөн бөгөөд ажлын гүйцэтгэл 62 орчим хувийн явцтай байгаа аж.
Баян-Өндөр сумын зүгээс хотын төвд орж ирсэн малыг хотоос тууж гаргахад мотоциклтой хүн ажиллуулж байгаа аж. Өнгөрөгч 7 хоногт хотын төвд орж ирсэн 460 гаруй тооны малыг хотоос гаргаж ажилласан байна. Харамсалтай нь Замын цагдаа нар ажил үүргээ гүйцэтгэж явахад нь торгоод байгаа учир хүндрэлтэй байгаа талаар сумын Засаг дарга мэдээллээ.
Орхон аймгийн ИТХ-ын 2016 оны 06 дугаар сарын 10-ны өдрийн 63 дугаар тогтоолоор жил бүрийн 8 дугаар сарын 12-ны өдрийг “Анхдагч, илгээлтийн эздийн өдөр” болгон орон нутгийн хэмжээнд тэмдэглэн өнгөрүүлэхээр тогтоосон. Энэ жил 8 дугаар сарын 12-ны өдөр Жаргалант суманд тэмдэглэхээр болжээ.
Шуурхайн төгсгөлд Орхон аймгийн Засаг даргын орлогч А.Түвшинжаргал үүрэг өглөө. Тухайлбал, хөрөнгө оруулалт, их засварын ажлуудыг яаралтай дуусгах, 2019 оны төсөв, 2020-2021 оны төсвийн төсөөллийг Сангийн яаманд хянуулж батлуулах, 2018-2019 оны хичээлийн жилийн бэлтгэл ажлын хүрээнд цэцэрлэгийн хүүхдийн шинжилгээний хуваарийг гаргах, сургууль цэцэрлэгүүдийн засварын ажлыг дуусгах зэрэг үүрэг чиглэлийг холбогдох байгууллага, агентлагийн удирдлагуудад өглөө.
