Баян-Өлгий, Увс, Завхан, Хөвсгөлийн нутаг, Говь-Алтай, Архангай аймгийн нутгаар есдүгээр сарын 23-24-нд шилжих шөнө нойтон цас орсон. Өнөөдрийн байдлаар Баян-Өлгий аймгийн Алтай суманд орсон цас хайлаагүй нэмж цас орвол өвөлжилт хүндэрч мал бэлчээргүй болох аюул нүүрлэж магадгүй хэмээн нутгийн малчид ярьж байна.
Алтай сумын уулын орой болон өндөрлөг газруудын цас 5-10 см, тал нутагаараа 2-3 см-ийн цасан бүрхүүл тогтожээ. Тус суманд өдөртөө -5-6 хэм, шөнөдөө -10 хэм хүрч хонож буй учраас хэд хоногийн өмнө орсон цас хайлж амжихгүй байгаа аж.
