“Хүний аминаас илүү үнэтэй барилга гэж байхгүй. Тийм учраас нэн тэргүүнд хөдөлмөрийн аюулгүй байдлыг хангуулж ажиллах”. Энэ бол МХЕГ-ын дэд дарга Г.Сугарбатын барилгын ажил гүйцэтгэгч байгууллагуудын удирдлага, инженер техникийн ажилтнуудад зориулсан сургалтын үеэр тэдэнд зориулж хэлсэн үг. Мөн тэрээр барилга байгууламжид зарцуулсан мөнгөнийхөө таваас доошгүй хувийг аюулгүй байдалд зарцуулах хэрэгтэйг онцолсон.
Мэргэжлийн хяналтын байгууллагаас бүтээн байгуулалт, барилгын ажлын улирал эхэлж байгаатай холбогдуулан эхлүүлээд байгаа “Эрүүл аюулгүй орчин-Таны оролцоо” аяны хүрэхийг хүссэн үр дүнгүүдийн нэг нь энэ. Хөдөлмөрийн аюулгүй байдлыг хангаж ажиллах, дотоод хяналтыг хэвшүүлэх. Мэргэжлийн хяналтын байгууллагаас БХБЯ-тай хамтран зохион байгуулсан тус сургалтад энэ чиглэлээр үйл ажиллагаа явуулж буй 140 гаруй хүн хамрагдлаа.
Та сургалтын эхэнд үг хэлэхдээ хөдөлмөрийн аюулгүй байдлын асуудлыг их чухалчиллаа?
Ерөөсөө л сургалтын маань гол зорилго. 2017 онд барилгын 17 осол гарч, найман хүний амь эрсдсэн. Барилгын компани, аж ахуйн нэгжүүдийн удирдлагуудад хөдөлмөрийн аюулгүй байдлыг дээд зэргээр хангуулж ажиллахыг л сануулаад байгаа юм. Ямар ч сайхан өндөр барилга барилаа гээд хүний амь наснаас үнэтэй барилга байгууламж гэж байхгүй шүү дээ.
Барилга байгууламжид зарцуулсан мөнгөнийхөө 5-аас доошгүй хувийг аюулгүй байдалд зарцуулах хэрэгтэй. Мэргэжлийн хяналтын байгууллагаас ч арга зүйн зөвлөгөө зөвлөмж өгчдэмжиж ажиллана.Хувь хүнийхээ зүгээс осол аваар гаргаж байгаа зүйлийг судлаад үзэхээр гурван зүйл л байгаа юм. Нэгдүгээрт хэнэггүй байдал.
Барилгын ажлаа эхлүүлэхдээ “Каска” өмс, хамгаалах хэрэгслээ зүүгээд гар гэдгийг мэргэжлийн байгууллагын зүгээс байнга хэлдэг. Гэтэл энэ бүгдийг ашигладаггүй. Хоёрдугаарт цагийн юмыг цагт нь хийх байдал. Энэ барилга дээр ийм алдаа дутагдал байна гээд хугацаатай үүрэг өгөхөөр түүнийг биелүүлэхгүй явж байгаад л осол гаргадаг.
Өнгөрсөн онд л гэхэд Хан-Уул дүүрэгт үйл ажиллагаа явуулж байсан компанийн барилгын ажлыг шалгалтаар илэрсэн зөрчлүүдийг үндэслэн зогсоосон байтал дураараа ажиллаж байгаад л хүний амь эрсдлээ. Гуравдугаарт саяын миний хэлсэнчлэн дураараа загнах байдал, норм дүрэм баримтлахгүй. Энэ хандлагуудаа өөрчлөх хэрэгтэй юм.
ОЛОН АСУУДЛЫГ ЦОГЦ БАЙДЛААР ХҮРГЭХИЙГ ЗОРЬСОН
Сургалтаар ямар мэдээлэл хүргэхийг зорив. Хэр үр дүнтэй болсон гэж та харж байна?
Бид сургалтаараа барилга байгууламжийн угсралтын үед ямар алдаа гарч байна, түүнийг хэрхэн засах вэ, хөдөлмөрийн болон эрүүл ахуйн аюулгүй байдлыг хэрхэн хангах вэ, ажил олгогчид дотоод хяналтын нэгж, ажилтныхаа гаргаж өгсөн мэдээллийг хэрхэн уншиж, ямар арга хэмжээ авах вэ гээд олон асуудлыг цогц байдлаар хүргэхийг зорилоо. Товчилж хэлбэл, бүх зүйл дээр анхаарч ажиллах, хүний амь нас эрсдэх ёсгүй гэсэн санааг барилга угсралтын чиглэлээр үйл ажиллагаа явуулж буй компаниудын удирдлагын түвшинд хүргэхийг зорьсон. Зөрчил дутагдлаа ний нуугүй ярилцаж, сайн туршлага сонсож, хэлэлцүүлэг өрнүүлсэн өгөөжтэй арга хэмжээ боллоо.
