Улирал бүхэн өөрийн өнгө төрх, байгалийн сонин сайхан үзэгдэлтэй. Түүгээрээ ч бидний сэтгэлийг татдаг. Иймээс мэргэжилтнүүд гэрийн интерьерийг улирлын чанартай хийж болно гэж үзэж байна. Та “Интерьер дахь дөрвөн улирал” гэхээр гайхаж байна уу? Үнэндээ дөрвөн улирлын гоёмсог өнгөний хослол, тэдгээрийн хоорондын уусал, зохицолдлогоог сайтар ажиглаад, өөрийн хүссэн улирлаар гэрээ засч тохижуулж болох нь ээ.
Өнгө бүхэн өөрийн өвөрмөц шинжтэй байдаг. Түүгээрээ ч хүний сэтгэлийг татах увидастай. Өнгө нь хүйтэн, дулаан, тод, бүдэг, гэрэлтэй, бүүдгэр гээд олон төрөл байдаг. Тэгвэл интерьер дахь дөрвөн улирал ч гэсэн өөрийн өнгөний зохицолтой. Интерьерт дурын улирлын өнгө хоорондоо зохицож болдог.
Хаврын интерьер
Үндсэн өнгө – дулаан, хөнгөн. Тодотгогч өнгө – шар. Хана, шалын өнгө – алтан шар, цайвар ногоон, өндөгний хальсны өнгө, нил цэцэг, чангаанзны өнгө. Нэмэлт өнгө – улбар шар, тэнгэрийн хөх, хонгор зул цэцэг, хүрэн улаан, хөх ягаан, шүрэн улаан, хаврын ногооны өнгө. Хар өнгө бараг хэрэглэгдэхгүй. Ихэвчлэн хүрэн өнгө голлоно. Тавилгын хөл, хөшиг тогтоогчийн өнгө шар металл байвал илүү чамин харагдана. Даавуун эдлэлийн хувьд хөнгөн чанартай, нэхмэл байх шаардлагатай. /Торго, мосул даавуу, торон/ Хаврын интерьер нь таны сэтгэл санааг өөдрөг болгоно.
Зуны интерьер
Үндсэн өнгө – хүйтэн, даруу, цайвар, бүдэг. Голлох өнгө – хөх. Хана, таазны өнгө – мөнгөлөг ган, сүүн цагаан, хуучин сарнайн өнгийг сонгоорой. Шалны өнгө – гялгар шар, ногоон, цайвар хул байна. Онцлог өнгө – тод ягаан, шар, тэнгэрийн хөх, хөх ягаан, улаан хөх, цайвар ногоон. Шоколадан, сүүтэй кофе шиг хүрэн өнгө илүү тохиромжтой. Сүүдэрлүүлэгч өнгө – чулуун нүүрсний өнгийг сонгоорой. Даавууны хувьд нимгэн торго, сатин, тюль байх хэрэгтэй. Зуны интерьерийг сонгосон бол өрөө тань уужим, гэгээтэй байх бөгөөд сэрүүн чанарыг бүрдүүлнэ.
Намрын интерьер
Үндсэн өнгө – дулаан, гэгээтэй. Зонхилох өнгө – улаан. Хана, таазны өнгө – улаан хүрэн, кофен, тоор жимсний өнгө илүү тохиромжтой. Шалны өнгө – зэв, тэмээний өнгөтэй адил байна. Сүүдэрлүүлэгч өнгө – хүрэн. Хар өнгө бага хэрэглэгдэнэ. Нэмэлт өнгө – шар, ногоон, цэнхэр, хөх ягаан, улбар шар. Улаан, шар металл эдлэл зохимжтой. Даавууны хувьд нягтрал сайтай, цайвар өнгийн хилэн, габардин, маалингыг сонгоорой. Намрын интерьер таны гэрийг уужим, дулаан болгоно.
Өвлийн интерьер
Үндсэн өнгө – хүйтэн, тод. Тодотгогч өнгө – цагаан, хар. Хана, таазны өнгө – цагаан, элсний өнгөтэй байна. Шалны өнгө – хул саарал, хөх саарал. Нэмэлт өнгө – тод улаан, шар, шилмүүст, оюу, цэнхэр байх бөгөөд эдгээрийг хар цагаан фон дээр хэрэглэх нь зохимжтой. Учир нь тухайн өнгийг тодотгож өгдөг. Цагаан, хар, мөнгөлөг металлыг сонгоорой. Даавууны хувьд гялалзсан саатай, атлас, торгомсог, сатин байх хэрэгтэй. Өвлийн интерьер нь тансаг сайхан орчинг бүрдүүлдэг.
